شويه تخاريف
--------------------------------------------------------------------------------
الموضوع ببساطة .. عبارة عن شوية تخاريف ..هايكون ايه غير كده ..
المهم .. الموضوع بتكلم فيه عن الانتماء .. كلمة غريبة قوي علينا اليومين دول .. خصوصا مع التخبط اللي حاصل جوانا كلنا ..
هو احنا المفروض ننتمي لمين .. تعالوا نشوف بعض الاجابات المحتملة ..
اولا : انا مصرية وفاتخر ..
- يا شيخة روحى العبى بعيد .. هي مصرعملت ليكى ايه ..وبتفتخرى....؟؟؟
- ازاي بقى مش هي اللي ربتني ..؟؟
- لا اللي رابكى ابوكى وامك ..
- مش هي اللي علمتني ..؟؟
- اللي علمك فلوس الدروس الخصوصية ..
- مش باكل من خيرها ..؟؟
- ايوة لحم كلاب وحمير ..
- مش انا عايشى على ارضها ..؟؟
- ايوة علشان تشتغل ويطلع عينك علشان غيرك يعيش مبسوط ..
- لا انا مصرية بقى .. مش كفاية اخدنا كاس الأمم مرتين ..
حلوة دى
ثانيا : انا عربية
- يعني ايه عربية ..؟؟ خليجية ولا شرقية افريقية ..؟؟
- عربي يا كابتن .. يعني بتكلم عربي ..
- يعني جامعة الدول العربية ..؟؟
- يعني الشعب العربي ..
- اللي واقف يتفرج مستني يشوف الدور على مين علشان يندبح ..؟؟
- يعني الضمير العربي ..
- ده اسم اغنية ولا ايه ..؟؟
- يعني القومية العربية ..
- يا عم الاموات لا تجوز عليهم الا الرحمة
ثالثا : انا مسلمة .. ايوة هي دي انا مسلمة ..
- انا اسف .. بس شيعية ولا سنية ..
- بقولك مسلمة .. بصلي واصوم
- يعني مع الاخوان ولا حزب الله .. حماس ولا فتح .. السنة ولا الشيعة .. السعودية ولا ايران ..
- مش عارف ..
انا مجرد مسلمة .. عربية .. مصرية .. ماليش في السياسة .. عايزة بس اعيش .. واحب الناس .. واتحب من الناس ..
عايزة الاقي معاملة كريمة استحقها .. عايزة الاقي اخواتي حواليا ..
انا مسلمة عربية مصرية .. مهما كان ومهما يكون .. هوه ده انا ..
ايه رايكم
هذة مجرد خاطرة.. هل انتمائنا للوطن . يفرض على الوطن مبادلتنا بالمثل ..
ام ان الانتماء بلا مقابل ..؟؟
ولماذا انتمي الى وطني .. هل لاني ولدت فيه ..؟؟ وهل لاننا ولدنا في بلدة معينة يجب علينا ان ننتمي اليها .. ؟؟
موضوع: على الماشى 
الخميس ديسمبر 09, 2010 7:24 pm
